Ærulaus glæpamaður endurreistur

Nikulás II rússakeisari kom fótunum undir bolsévika með skefjalaustu tómlæti sínu. Um það þarf vart að deila. Þegar blsévikar lóguðu keisarafjölskyldunni var Nikulás löngu orðinn ærulaus langt út fyrir gröf og dauða að eilífu út af skítlegri framkomu sinni við þegna sína; hann bara mókti eins og ráðalaus hundur meðan rússneska þjóðin svalt heilu hungri. Það var því ekki við öðru að búast en hann fengi fyrir ferðina að lokum.

Ég veit eiginlega ekki hvernig Hæstarétti Rússlands hefur dottið í hug að framkvæma hið ómögulega, þ.e. veita ærulausum keisarafanti uppreins æru. Og það næstum því 100 árum eftir að samtíðarmenn hans þökkuðu honum fyrir meðferðina með riffilskoti. Hæstarétti Rússlands hefur í þessu tilfelli yfirsést að meiri líkur eru á að upp verði fundin nothæf, kraftmikil eilífðarvél en að hægt sé að endurreisa æru löngu látins glæpamanns.

Það að rússar hafi, með hæstaréttardómi, gert Nikulás II að háæruverðugri persónu, er svona álíka gáfulegt og að Hæstiréttur Íslands úrkurðaði að Axlar-Björn skuli fá uppreisn æru. Reyndar verður að taka fram, svo allrar sanngirni sé gætt, að fjöldi þeirra sem Axlar-Björn myrti er aðeins brota-brotabrot af þeim manngrúa sem lá í valnum af völdum Nikulásar keisara sem nú hefur endurheimt æru sína.

-ALy

 

Rússneska keisarafjölskyldan fær uppreisn æru

Sjáflsvirðing dana í hættu

Í gærkvöldi hafði blaðamaður Foldarinnar samband við nokkra dani sem starfa í ýmsum atvinnugreinum. Í máli allra þeirra kom fram, að nú væri lag að hreinsa danskt samfélag af öllum ítökum íslendinga í dönsku athafnalífi. Þeim bar einnig saman um, að það yrði mikill léttir ef íslensku útrásarvíkingarinr hyrfu af vettvangi þar sem dönum hefði frá upphafi verið meinilla við fjárfestingar íslendinga á danskri grund, fundist þær vera til skammar fyrir dani og haft vond áhrif á sjálfsviringu þeirra.

ALy

Gætu þurft að selja

Á eftir stormi kemur logn

Eftir langvarandi stormasama ótíð í lögregluumdæmi Suðurnesja er loks komið logn og heiðríkja.

Jóhann R. Benediktsson hefur látið af störfum vegna óhlýðni við yfirboðara sína. Í stað hans hefur verið settur maður sem kunnur er af hægviðri og lognmollu. Sá mun ekki styggja Björn Bjarnason né Harald Johanessen. Það er góðs viti.

Eða hvað?

-ALy

Djúpt snortinn og þakklátur

Enn meiri hefnd í vændum ef óhróðrinum linnir ekki

Fram til þessa dags hefur ekki borið góðan ávöxt að veitast að ráðamönnum þjóðarinnar með upphrópunum og illu umtali. Í hinu daglega lífi koma ætíð upp vandamál sem þarf að leysa og verður að leysa. Glitnir banki hf. var sokkinn niður í kviksyndi fjármálaóreiðunnar í heiminum og hefði borið þar beinin hefði Davíð Oddsson tekið í taumana og komið bankanum á þurrt í tíma. Þessi einföldu sannindi verða menn að skilja, hvort sem þeir heita Þorsteinn Már Baldvinsson, Jón Ásgeir Jóhannesson, eða eitthvað annað.

Þess vegna er raunarlegt að horfa upp á Þorstein Má og Jón Ásgeir, sem hafa svo sannarlega fengið sín tækifæri í lífinu, veitast opinberlega að Davíð Oddssyni seðlabankastjóra og fyrrum forsætisráðherra með óhróðri og dylgjum. Þessir duglegu drengir, sem hafa baðað sig í því frelsi sem Davíð Oddsson færði þeim þegar hann komst til valda, reyna nú hvað þeir geta til að sverta mannorð hans með því að læða inn í umræðuna að Davíð sé óhæfur í opinberri þjónustu og jafnvel bankaræningi! Ég fordæmi slíkan munnsöfnuð. Árinni kennir illur ræðara. En ég bið líka föður ljóssins að miskuna þeim glitnisforkólfum því þeir vita alls ekki hvað þeir eru að segja eða gjöra.

Fyrr í kvöld hitti ég góða konu, framúrskarandi heiðarlega og tæra í andanum. Þessi kona hefir það sem kallað er spádómsgáfa. Hún sagði okkur sem viðstaddir voru, að ef helstu stjórnendur Glitnis banka hf. létu ekki starx af dylgjum sínum og óhróðri í garð Davíðs Oddssonar ættu þeir í vændum enn meiri hefnd en nú þegar er fram komin. Þessari merku konu hefir aldrei brugðist í því sem hún hefir spáð.

Í Guðs friði.

-SrB 

Sameining Glitnis og Landsbanka ólíkleg

Eiturlyfjaneysla á Landspítalanum

Víða er pottur brotinn í þjóðfélaginu. En þó keyrir um þverbak, að eiturlyfjaneysla á Landspítalanum skuli hafa aukist um 34,6% á fyrstu átta mánuðum ársins. Hvernig á því stendur að lyfjasukkið hafi vaxið eins gígantískt og raun ber vitni er fullkomlega óskilanlegt. Og það þarf skýringar á allri þessari neyslu, opinbera skýringu þar sem sannleikurinn verður leiddur í ljós, en ekki einhverja venjulega lygaþvælu. Heilbrigðisráðherra verður náttúrlega að standa fyrir máli sínu þegar svo er komið að sjúklingar Landspítalans hafa eflst af eiturlyfjaneyslu um 34,6% á fáeinum mánuðum.

Í ljósi þessara alvarlegu upplýsinga, hlýtur krafa um alsherjar sakamálarannsókn um aukna ásókn inniliggjandi sjúklinga í vímuefni að koma upp á borðið. Slík rannsókn er ekki bara æskileg heldur nauðsynleg, bráðnauðsynleg meira að segja. Það verður að velta við hverjum steini í lyfjabúri Landspítalans og fylgja fast efir að öll kurl komi til grafar. Það þýðir ekkert að æpa um vímulausa æsku á götutorgum meðan landspítalafólkið bætir í dópneysluna sem aldrei fyrr.

-ALy

Lyfjakostnaður Landspítalans jókst um 34,6%

Fyrr mun ég liggja dauð

Ekki er nema von að Jón ásgeir sé meyr og kökri eins og tjargaður gæsasteggur eftir yfirhalninguna sem Davíð Oddsson veitti honum um helgina. Menn hafa fellt tár af minna tilefni. Vissulega rassskelti Davíð stjórnarformann Baugs fast og ag innlifun. Þetta var stórflenging á heimsmælikvarða.

Þrátt fyrir allt reynir Jón Ásgeir þó að bera sig mannalega og talar um að nú muni hann nota tímann til að endurskipuleggja rekstur sinn. Sá grunur læðist þó að, að sú endurskipulagning kunni að enda með einni pylsusoppu uppi á Arnardalsheiði um það bil sem krossinn verður rekinn ofan í leiði Baugsveldisins.

Nokkuð hefur borið á, að rætnar eiturtungur haldi því fram, eins og ekkert sé, að björgunarleiðangur Davíðs Oddssonar á sunnudaginn hafi fyrst og fremst verið farinn til að ná fram afgerandi hefndum á Jóni Ásgeiri og Jóhannesi föður hans, láta þá finna til tevatnsins, sýna þeim í eitt skipti fyrir öll hvar Davíð keypti ölið. Þessi kenning er auðvitað öldungis fráleit enda sprottin upp af biluðu sálarlífi, illgirni. Davíð Oddsson var einungis að bjarga þjóð sinni úr klóm Jóns Ásgeirs og annarra fjárglæframanna. Fyrir það á Davíð mikið lof skilið.

Það er síðan eðlileg framvinda þessa máls, að Björgólfsfeðgar taki við Glitni úr höndum ríkisins. Það væri í hæsta máta óeðlilegt ef ríkið færi aftur að reka banka með ellri þeirri spillingu sem slíkum rekstri fylgir; eða vill fólk kanske að menn á borð við Sverri Hermannson verði endurreistir sem ríkisbankastjórar? Svarið er einfalt: Fólk vill það ekki.

Þó móti blási þessa stundina, megum við, sem höfum tileinkað okkur frelsis- og sjálfstæðishugsjónina, ekki gefast upp, leggja hendur í skaut og láta ríkisafskiptasinna, kommúnista og götulýð taka öll völd í þjóðfélaginu, en á því er vissulega töluverð hætta eins og allt er í pottinn búið. Við verðum að berjast af alefli fyrir frelsi og frjálshyggju sem aldrei fyrr.

Fyrr mun ég liggja dauð en verða rauð.

-SvDr

Telur Stoðir ekki fara í þrot

Gjafir eru yður gefnar

Það mun vera fyllilega raunhæf aðgerð af hálfu Seðlabankans og ríkisstjórnarinnar að kaupa Glitni banka hf og færa hann eigendum Landsbankans - að gjöf. Það myndi styrkja efnahagslíf þjóðarinnar í þeirri nístandi kulnun á fjármagnsmarkaðnum sem þjóðir heims takast á við um þessar mundir.Og engir eru betur til þess fallnir að taka við gjöfum frá Seðlabanka og ríki er hinir góðu og gegnu Björgólfsfeðgar. Drottinn blessi þá og varðveiti.

Enn hefur Davíð Oddsson sannað að hann er mesti stjórnvitringur Íslands, kanske allrar íslandssögunnar, en með afburða skörpum viðbrögðum sínum síðustu tvo sólarhringana bjargaði hann þjóð sinni frá glötun, með Guðs hjálp.

Við íslendingar getum hrósað happi að eiga slíkan mann sem Davíð Oddsson er. Það hefur margsinnis komið á daginn að Davíð Oddsson starfar og lifir undir handarjaðri algóðs Guðs sem leiðir hann markvisst gegnum góða tíma sem slæma.  Og ætíð skilar hann skipi sínu í höfn á réttum tíma þrátt fyrir válynd veður á köflum.

Eftir 1000 ár verður Davíðs Oddssons minnst sem mesta stórmennis Íslands, spámanns sem hlustaði grant eftir vilja Drottins og fór eftir honum í hvívetna þjóð sinni til heilla og hamingju. Það er mikil náð að eiga Davíð Oddsson. Blessað veri hans nafn um aldur og eilífð.

Guð gefi ykkur góða nótt ágætu lesendur.

Í Guðs friði.

-SrB 

Möguleg sameining Landsbankans og Glitnis rædd

Kristni H. á förum eftir árás óaldalýðsarmsins á hann

Það er augljóst mál, að Kristinn H. Gunnarsson er í þann veginn að yfirgefa ormastíu útlendingahaturs og mannfyrirlitningar, Frjálslynda flokkinn. Nú undir kvöld sögðu heimildarmenn blaðamanns Foldarinnar, að líkur hefðu aukist til muna á að Kristinn muni innan skamms söðla um og ganga til liðs við Vinstrihreyfinguna grænt framboð. Þar sé aðeins um dagaspursmál að tefla.

Sem kunnugt er var Kristinn á sínum tíma aðeins hársbreidd frá að fylkja liði með Steingrími J. og Ögmundi þegar stofnum VG var í undirbúningi. Ekkert varð hins vegar úr þeirri ráðagerð þar sem Kristinn hafði ekki nægilega trú á að sá flokkur næði nokkrum árangri í kosningum og valdi því Framsóknarflokkinn sem ákjósanlegan valkost fyrir framhaldslíf sitt í pólitík. Þar veðjaði Kristinn á rangan hest og því fór sem fór.

Þá hefur lengi verið vitað að Kristinn H. hefur mikla skömm á mörgum af forsvarsmönnum Samfylkingarinnar, ekki síst þeim sem hann starfaði með Alþýðubandalaginu á árum áður. Þessi sýn Kristins á ýmsar af höfuðpersónum Samfylkingarinnar gerir honum næsta ókleyft að ganga til liðs við þann flokk.

Það verður teljast grófur afleikur af hálfu Guðjóns Arnars Kristjánssonar að hafa látið til leiðast að reka rýtinginn í bakið á Kristni H. Gunnarssyni og ganga þar með opinberlega í lið með óaldarlýðsarmi Frjálslyndra. Þetta eru að sjálfsögðu ekki fyrstu stórmistök Guðjóns Arnars. Fyrstu alvarlegu mistökin sem hann gerði var að flæma Margréti Sverrisdóttur frá flokknum til að þóknast óaldarlýðsarminum. Það góða við þessi afglöp formannsins er sú staðreynd, að Frjálslyndi flokkurinn hverfur af sjónarsviðinu í næstu kosningum. Farið hefur fé betra. 

-ALy

 

 

Kristinn undrast ákvörðun formannsins

Banabitinn orðinn þingflokksformaður

Það hlakkar sannarlega í banabita Frjálslynda flokksins, Jóni Magnússyni, þessa stundina. Enda hefur honum tekist að kengbeygja Kristinn H. Gunnarsson undir fætur sér. Nú verður auðveldara fyrir útlendingahatursgengið í þessum fráhrindandi stjórnmálaflokki að stunda rógsherferð sína á hendur fólki sem af af erlendu bergi brotið.

Samkvæmt heimildum Foldarinnar, munu Jón Magnússon þingflokksformaður og hans nótar, líta á Kristinn H. Gunnarsson eins og hvern annan illa skeindan útlending fyrir það eitt að reyna að stöðva vitleysuna og bullið sem stöðugt vellur upp úr þeim.

Við næstu alþingiskosningar verður þjóðin að sameinast um að þurrka Frjálslynda flokkinn út þar sem hann hefur orðið ber að samfélagsskemmandi framkomu í málflutningi sínum.

Þá er vert að nefna þá kenningu, að Frjálslyndi flokkurinn sé hugsaður af hálfu málsmetandi sjálfstæðismanna sem lekabytta fyrir Sjálfstæðisflokkinn, þ.e. taka við óánægðum sjálfstæðismönnum svo þeir gangi ekki til liðs við Samfylkingu, VG eða Framsókn. Ekki svo að skilja að nokkrum sjálfstæðismanni sé eftirsjón af þessu ófrýnilega liði að öðru leyti en því að ágætt er að þeir kjósi til hægri á kördag.

En banabitinn er sem sagt orðinn þingflokksformaður Frjálslyndra. Og það mun í fyllingu tímans verða þeirra banabiti, sem betur fer. 

Jón Magnússon þingflokksformaður

Illgirni dana á sér engin takmörk

Það kemur höfundi þessa pistils nokkuð spánskt fyrir sjónir, að danir hafi allt í einu áhyggjur af Íslandi. Að minnsta kosti fer fáum sögum af áhyggjum þessarar fyrrum herraþjóðar íslendinga á þeim tímabilum sem lá við landauðn á Íslandi sökum hungurs og harðinda og heyrði þó Ísland undir dönsku krúnuna í þá daga.

Áhyggjur dana af þessu sinni draga fyrst og fremst dám af illgirni í garð íslendinga; þeir hlakka yfir óförum í efnahagslífi okkar, en þessháttar hugarfar er stundum kallað þórðargleði til heiðurs Þórði nokkrum sem þekktur var fyrir að gleðjast yfir óförum annarra.

Ef danskir spjátrungar ætla að halda áfram að skensa íslendinga á þessum nótum, nýta tækifærið meðan það gefst og við eigum erfitt uppdráttar, verða stjórnvöld okkar að bregðast við af fullum þunga. Í þeim efnum kemur vel til mála að slíta stjórnmálasambandi okkar við Danmörku og fylgja því eftir með því að vísa dönum sem búa á Íslandi úr landi. Það er hvort eð er ekkert þjóðhagslegt gagn að þessu fólki fyrir okkur, nema síður sé.

Verði hinsvegar niðursveiflan á íslenskum fjármálamarkaði til þess að skaða hagkerfi dana og leggja það í rúst, má segja að okkar bankakrísa hafi ekki verið til einskis. Því það skulu danir vita, að íslendingum er ósárt að sjá þá einu sinni veltast upp úr skítnum, bjargarlausa og vinalausa. 

ALy

Danir hafa áhyggjur af Íslandi