Eiturlyfjaneysla á Landspítalanum

Víða er pottur brotinn í þjóðfélaginu. En þó keyrir um þverbak, að eiturlyfjaneysla á Landspítalanum skuli hafa aukist um 34,6% á fyrstu átta mánuðum ársins. Hvernig á því stendur að lyfjasukkið hafi vaxið eins gígantískt og raun ber vitni er fullkomlega óskilanlegt. Og það þarf skýringar á allri þessari neyslu, opinbera skýringu þar sem sannleikurinn verður leiddur í ljós, en ekki einhverja venjulega lygaþvælu. Heilbrigðisráðherra verður náttúrlega að standa fyrir máli sínu þegar svo er komið að sjúklingar Landspítalans hafa eflst af eiturlyfjaneyslu um 34,6% á fáeinum mánuðum.

Í ljósi þessara alvarlegu upplýsinga, hlýtur krafa um alsherjar sakamálarannsókn um aukna ásókn inniliggjandi sjúklinga í vímuefni að koma upp á borðið. Slík rannsókn er ekki bara æskileg heldur nauðsynleg, bráðnauðsynleg meira að segja. Það verður að velta við hverjum steini í lyfjabúri Landspítalans og fylgja fast efir að öll kurl komi til grafar. Það þýðir ekkert að æpa um vímulausa æsku á götutorgum meðan landspítalafólkið bætir í dópneysluna sem aldrei fyrr.

-ALy

Lyfjakostnaður Landspítalans jókst um 34,6%

Athugasemdir

[Lilja (IP-tala skráð) 30.9.2008 kl. 13:18]

Farðu nú varlega í að draga of sterkar ályktanir um lyfjanotkunina - ég hugsa nú að gengi íslensku krónunnar hafi nú mun meira að segja um þennan kostnaðarauka en það að sjúklingarnir hafi fengið meira af lyfjum.

[Johnny Bravo, 30.9.2008 kl. 13:41]

Góði besti slakaðu þig aðeins niður.

Það er alltaf verið að finna upp ný og ný lyf og það hefur ekki verið tekin ákvörðun um hvenær menn eiga að hætta að ausa peningum í einstaklinginn. Við viljum hafa þetta svona "besta mögulega þjónusta" alveg sama hvaða gagn viðkomandi gerir í þjóðfélaginu.

Svo er alltaf verið að finna upp ný lyf, hjarta og gigtarlyf td. sem eru mjög dýr, en þetta gerir sumum það mögulegt að vinna og vera með 5mil á ári og borga 2-2,5 í skatt og ríkið borgar 1mil í lyf í staðinn. Það er líka hægt að kaupa ódýrari og lélegri lyf og viðkomandi getur ekki unnið og fær þá 1,5-2mil í bætur í staðinn.

En það er um að gera að endurskoða þetta, nota sem mest af samheitalyfjum sem kosta ekkert því einkaleyfið er runnið út. Hugsanlegt að framleiða það sjálf ef viðunandi verð fæst ekki.

Við eigum alveg fyrir þessu það sem við eigum ekki fyrir er að missa einstaklinga milli 25-60ára sem er búið að passa til 6ára aldurs og mennta í 10+4+(3eða4) ár, fyrir 24mil. eða svo.

Ég borga glaður 6.333kr. á 8mánuðum, svo fólki batni og þjáist ekki.

[Blaðamenn Foldarinnar, 30.9.2008 kl. 16:11]

Einn af mörgum ljótum göllum íslendinga er óbetranleg lyfjatrú þeirra. Mætti halda að fólk hér á landi sé búið að telja sér trú um að þeir geti ekki litið glaðan dag nema éta svo og svo mikið af töflum og mixtúrum.

Miðað við stóraukna lyfjaneyslu á Landspítalanum á þessu ári, mætti halda að heilbrigðisráðherra hafi trölltrú á eiturgumsi lækna eða einfaldlega sofnað á verðinum gagnvart eiturlyfjavánni. 

Við skulum ekki gleyma að læknadóp er dóp ekki síður en hass, heróín, kókaín, amfetamín, e-töflur og svo framvegis.

-ALy 

[Lilja (IP-tala skráð) 1.10.2008 kl. 10:27]

Enn og aftur skín vanþekkingin í gegn hjá þér ALy.  Þú virðist álíta sem svo að ölll lyf sem gefin séu á sjúkrahúsum landsins séu ávanabindandi lyf.  Því fer fjarri.  Dýrustu lyfin eru sennilega krabbameinslyf ofl slík lyf.  Ég býst við að skoðun þín á þeim kostnaði sem þau hafa í för með sér myndi breytast ef þú eða þínir nánustu þyrfti á þeim að halda.